ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਲੁਧਿਆਣਾ ਤੋਂ ਸੰਸਦ (ਰਾਜ ਸਭਾ) ਸੰਜੀਵ ਅਰੋੜਾ ਵੱਲੋਂ ਰੇਲਵੇ ਵਿੱਚ ਖਾਲੀ ਅਸਾਮੀਆਂ ਬਾਰੇ ਪੁੱਛੇ ਸਵਾਲ ਦੇ ਜਵਾਬ ਵਿੱਚ ਖੁਲਾਸਾ ਕੀਤਾ ਹੈ ਕਿ 1 ਜੁਲਾਈ ਤੱਕ ਕੁੱਲ 2,61,233 ਅਸਾਮੀਆਂ ਵਿੱਚੋਂ 2023 ਤੋਂ, ਸੰਚਾਲਨ ਸੁਰੱਖਿਆ ਸ਼੍ਰੇਣੀਆਂ ਦੀਆਂ ਅਸਾਮੀਆਂ 53,178 ਹਨ।
ਅਰੋੜਾ ਨੇ ਅੱਜ ਇੱਥੇ ਇਹ ਜਾਣਕਾਰੀ ਦਿੰਦੇ ਹੋਏ ਕਿਹਾ ਕਿ ਉਨ੍ਹਾਂ ਨੇ ਪੁੱਛਿਆ ਸੀ ਕਿ ਕੀ ਇਹ ਤੱਥ ਹੈ ਕਿ ਰੇਲਵੇ ਵਿੱਚ ਜੂਨ 2023 ਤੱਕ 2.74 ਲੱਖ ਗਰੁੱਪ 'ਸੀ' ਅਸਾਮੀਆਂ ਖਾਲੀ ਸਨ, ਜਿਨ੍ਹਾਂ ਵਿੱਚੋਂ 1.7 ਲੱਖ ਸੁਰੱਖਿਆ ਸ਼੍ਰੇਣੀ ਵਿੱਚ ਸਨ; ਅਤੇ ਜੇਕਰ ਅਜਿਹਾ ਹੈ, ਤਾਂ ਦੇਸ਼ ਵਿੱਚ ਹਾਲ ਹੀ ਵਿੱਚ ਵਾਪਰੇ ਹਾਦਸਿਆਂ ਅਤੇ ਬੇਰੁਜ਼ਗਾਰੀ ਦੇ ਮੱਦੇਨਜ਼ਰ ਖਾਲੀ ਅਸਾਮੀਆਂ ਨੂੰ ਭਰਨ ਲਈ ਸਰਕਾਰ ਵੱਲੋਂ ਕੀ ਕਦਮ ਚੁੱਕੇ ਗਏ ਹਨ।
ਸਦਨ ਦੀ ਮੇਜ਼ 'ਤੇ ਆਪਣਾ ਬਿਆਨ ਰੱਖਦਿਆਂ ਰੇਲ ਮੰਤਰੀ ਨੇ ਕਿਹਾ ਕਿ ਭਾਰਤੀ ਰੇਲਵੇ ਦੇ ਸੰਚਾਲਨ ਦੇ ਆਕਾਰ, ਸਥਾਨਿਕ ਵੰਡ ਅਤੇ ਗੰਭੀਰਤਾ ਨੂੰ ਦੇਖਦੇ ਹੋਏ, ਖਾਲੀ ਅਸਾਮੀਆਂ ਦਾ ਹੋਣਾ ਅਤੇ ਉਨ੍ਹਾਂ ਨੂੰ ਭਰਨਾ ਇੱਕ ਨਿਰੰਤਰ ਪ੍ਰਕਿਰਿਆ ਹੈ। ਖਾਲੀ ਅਸਾਮੀਆਂ ਮੁੱਖ ਤੌਰ 'ਤੇ ਕੰਮਕਾਜੀ ਜ਼ਰੂਰਤਾਂ ਦੇ ਅਨੁਸਾਰ ਭਰਤੀ ਏਜੰਸੀਆਂ ਦੇ ਨਾਲ ਰੇਲਵੇ ਦੁਆਰਾ ਇੰਡੈਂਟ ਜਾਰੀ ਕਰਕੇ ਭਰੀਆਂ ਜਾਂਦੀਆਂ ਹਨ।
ਮੰਤਰੀ ਨੇ ਅੱਗੇ ਦੱਸਿਆ ਕਿ 2004-2014 ਦੌਰਾਨ ਭਾਰਤੀ ਰੇਲਵੇ ਵਿੱਚ ਨਿਯੁਕਤੀ ਲਈ 411624 ਉਮੀਦਵਾਰਾਂ ਨੂੰ ਸੂਚੀਬੱਧ ਕੀਤਾ ਗਿਆ ਸੀ, ਜਦਕਿ 1 ਅਪ੍ਰੈਲ 2014 ਤੋਂ 30 ਜੂਨ 2023 ਤੱਕ ਦੇ ਨੌਂ ਸਾਲਾਂ ਦੀ ਮਿਆਦ ਦੌਰਾਨ 486031 ਉਮੀਦਵਾਰਾਂ (ਆਰਜ਼ੀ) ਨੂੰ ਸੂਚੀਬੱਧ ਕੀਤਾ ਗਿਆ ਹੈ। 1 ਜੁਲਾਈ 2023 ਤੱਕ ਕੁੱਲ ਅਸਾਮੀਆਂ 2,61,233 ਹਨ, ਓਪਰੇਸ਼ਨਲ ਸੇਫਟੀ ਸ਼੍ਰੇਣੀਆਂ ਦੀਆਂ ਅਸਾਮੀਆਂ 53,178 ਹਨ।
ਅਰੋੜਾ ਨੇ ਕਿਹਾ ਕਿ ਮੰਤਰੀ ਨੇ ਅੱਗੇ ਕਿਹਾ ਕਿ ਲਗਭਗ 2.37 ਕਰੋੜ ਉਮੀਦਵਾਰਾਂ ਦੇ ਕੰਪਿਊਟਰ ਅਧਾਰਤ ਟੈਸਟ (ਸੀ.ਬੀ.ਟੀ.) ਕਰਵਾ ਕੇ 1,39,050 ਉਮੀਦਵਾਰਾਂ ਨੂੰ ਸੂਚੀਬੱਧ ਕਰਨ ਲਈ ਹਾਲ ਹੀ ਵਿੱਚ ਇੱਕ ਵਿਸ਼ਾਲ ਭਰਤੀ ਪ੍ਰਕਿਰਿਆ ਪੂਰੀ ਕੀਤੀ ਗਈ ਹੈ। ਨਾਨ-ਟੈਕਨੀਕਲ ਪਾਪੂਲਰ ਕੈਟਾਗਰੀਜ਼ (ਐਨਟੀਪੀਸੀ) ਲਈ ਸੈਂਟ੍ਰਲਾਈਜ਼ਡ ਐਮਪਲੋਇਮੈਂਟ ਨੋਟੀਫਿਕੇਸ਼ਨ (ਸੀਈਐਨ) 01/2019 ਲਈ ਸੀਬੀਟੀ 1.26 ਕਰੋੜ ਉਮੀਦਵਾਰਾਂ ਲਈ 68 ਦਿਨਾਂ ਵਿੱਚ 133 ਸ਼ਿਫਟਾਂ ਵਿੱਚ 211 ਸ਼ਹਿਰਾਂ ਅਤੇ 15 ਭਾਸ਼ਾਵਾਂ ਵਿੱਚ 726 ਕੇਂਦਰਾਂ 'ਤੇ ਆਯੋਜਿਤ ਕੀਤਾ ਗਿਆ ਸੀ।
ਇਸੇ ਤਰ੍ਹਾਂ, ਸੀਈਐਨ-ਆਰਆਰਸੀ 01/2019 (ਲੈਵਲ-1) ਲਈ ਸੀਬੀਟੀ 1.11 ਕਰੋੜ ਉਮੀਦਵਾਰਾਂ ਲਈ 191 ਸ਼ਹਿਰਾਂ ਅਤੇ 551 ਕੇਂਦਰਾਂ ਵਿੱਚ 15 ਭਾਸ਼ਾਵਾਂ ਵਿੱਚ 33 ਦਿਨਾਂ ਵਿੱਚ 99 ਸ਼ਿਫਟਾਂ ਵਿੱਚ ਕਰਵਾਈ ਗਈ। ਇਹ ਦੋਸ਼ਰਹਿਤ ਪ੍ਰਕਿਰਿਆਵਾਂ ਬਹੁਤ ਹੀ ਨਿਰਪੱਖਤਾ ਅਤੇ ਪਾਰਦਰਸ਼ਤਾ ਨਾਲ ਕੀਤੀਆਂ ਗਈਆਂ ਸਨ, ਜਿਸ ਨਾਲ ਭਾਰਤੀ ਰੇਲਵੇ ਵਿੱਚ ਸੰਚਾਲਨ ਸੁਰੱਖਿਆ ਸ਼੍ਰੇਣੀਆਂ ਵਿੱਚ ਮਹੱਤਵਪੂਰਨ ਵਾਧਾ ਹੋਇਆ ਹੈ।
ਇਸ ਦੌਰਾਨ, ਅਰੋੜਾ ਨੇ ਉਮੀਦ ਪ੍ਰਗਟਾਈ ਕਿ ਰੇਲਵੇ ਦੇ ਦੁਰਘਟਨਾ ਮੁਕਤ ਸੰਚਾਲਨ ਨੂੰ ਯਕੀਨੀ ਬਣਾਉਣ ਲਈ ਸਾਰੀਆਂ ਖਾਲੀ ਅਸਾਮੀਆਂ, ਖਾਸ ਕਰਕੇ ਸੰਚਾਲਨ ਸੁਰੱਖਿਆ ਸ਼੍ਰੇਣੀਆਂ ਵਿੱਚ, ਜਲਦੀ ਤੋਂ ਜਲਦੀ ਭਰੀਆਂ ਜਾਣਗੀਆਂ। ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਰੇਲਵੇ ਵਿੱਚ ਖਾਲੀ ਪਈਆਂ ਸਾਰੀਆਂ ਅਸਾਮੀਆਂ ਨੂੰ ਭਰਨ ਦੀ ਲੋੜ ਹੈ ਕਿਉਂਕਿ ਵੱਡੀ ਗਿਣਤੀ ਵਿੱਚ ਨੌਜਵਾਨ ਸਰਕਾਰੀ ਖੇਤਰ ਦੀਆਂ ਨੌਕਰੀਆਂ ਦੀ ਤਲਾਸ਼ ਕਰ ਰਹੇ ਹਨ, ਖਾਸ ਕਰਕੇ ਭਾਰਤੀ ਰੇਲਵੇ ਵਿੱਚ, ਜਿਨ੍ਹਾਂ ਨੂੰ ਯੋਗਤਾ ਅਤੇ ਖੇਤਰ ਮੁਤਾਬਿਕ ਵਧੀਆ ਤਨਖ਼ਾਹ ਲੈਣ ਲਈ ਇੱਕ ਬਿਹਤਰ ਵਿਕਲਪ ਮੰਨਿਆ ਜਾਂਦਾ ਹੈ।