ਲਾਇਨਜ਼ ਕਲੱਬ ਇੰਟਰਨੈਸ਼ਨਲ ਜੋਕਿ ਹਮੇਸ਼ਾ ਹੀ ਸਮਾਜ ਸੇਵਾ ਦੇ ਕੰਮਾਂ ਲਈ ਸਭ ਤੋਂ ਅੱਗੇ ਰਹਿੰਦਾ ਹੈ ਅਤੇ ਬਿਨਾਂ ਕਿਸੇ ਭੇਦ-ਭਾਵ ਦੇ ਹਰ ਮੌਕੇ ਸਮਾਜ ਨੂੰ ਨਵੀਂ ਸੇਧ ਦੇਣ ਲਈ ਤਤਪਰ ਰਹਿੰਦਾ ਹੈ। ਸਾਬਕਾ ਡਿਸਟ੍ਰਿਕਟ ਗਵਰਨਰ ਲਾਇਨ ਪ੍ਰੀਤ ਕੰਵਲ ਸਿੰਘ ਨੇ ਦੱਸਿਆ ਕਿ ਹੁਣ ਲਾਇਨਜ਼ ਕਲੱਬ ਇੰਟਰਨੈਸ਼ਨਲ ਵੱਲੋਂ ਇਕ ਨਵਾਂ ਪ੍ਰੋਜੈਕਟ ਲਾਂਚ ਕੀਤਾ ਗਿਆ ਹੈ, ਜਿਸਦਾ ਨਾਮ ਈ-ਵੇਸਟ ਡੰਪ ਜਾਂ ਡੋਨੇਟ ਰੱਖਿਆ ਗਿਆ ਹੈ।
ਇਸ ਲਈ 13 ਜਨਵਰੀ ਤੋਂ ਲੈ ਕੇ 15 ਫਰਵਰੀ 2023 ਤੱਕ ਪੂਰੀ ਦੁਨੀਆਂ ਵਿਚ ਇਕ ਮੁਹਿੰਮ ਚਲਾਈ ਜਾ ਰਹੀ ਹੈ ਜਿਸ ਦੇ ਤਹਿਤ ਸਾਡੇ ਸਭ ਦੇ ਘਰਾਂ ਵਿਚ ਪਏ ਈ-ਵੇਸਟ ਜਿਸ ਵਿਚ ਪੁਰਾਣੇ ਖਰਾਬ ਰਿਮੋਟ ਕੰਟਰੋਲ, ਮੋਬਾਇਲ ਫੋਨ, ਟੀ.ਵੀ, ਕੰਪਿਊਟਰ, ਲੈਪਟੌਪ, ਬੱਚਿਆਂ ਦੇ ਇਲੈਕਟ੍ਰਾਨਿਕ ਖਿਡੌਣੇ ਅਤੇ ਹੋਰ ਬਹੁਤ ਸਾਰਾ ਇਲੈਕਟ੍ਰੋਨਿਕ ਸਮਾਨ ਸ਼ਾਮਿਲ ਹੈ ਨੂੰ ਇਕੱਠਾ ਕਰਕੇ ਰੀਸਾਈਕਲ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ।
ਇਹ ਸਾਰਾ ਸਮਾਨ ਜੋਕਿ ਆਉਣ ਵਾਲੇ ਸਮੇਂ ਵਿਚ ਸਾਡੇ ਸਭ ਲਈ ਬਹੁਤ ਘਾਤਕ ਸਿੱਧ ਹੋਣ ਵਾਲਾ ਹੈ। ਓਹਨਾ ਅੱਗੇ ਦੱਸਿਆ ਕਿ ਇਸ ਲਈ ਅਸੀਂ ਈ-ਵੇਸਟ ਪ੍ਰਦੂਸ਼ਣ ਘਟਾਉਣ ਲਈ ਸਾਰੀ ਦੁਨੀਆਂ ਵਿਚੋਂ ਪੁਰਾਣੀਆਂ ਇਲੈਕਟ੍ਰਾਨਿਕ ਚੀਜਾਂ ਇਕੱਠੀਆਂ ਕਰ ਰਹੇ ਹਾਂ ਅਤੇ ਨਾਵਰਤਣਯੋਗ ਬਿਜਲੀ ਯੰਤਰਾਂ ਨੂੰ ਨਸ਼ਟ ਕਰ ਰਹੇ ਹਾਂ।
ਭਾਰਤ ਦੇ ਲਾਇਨਜ਼ ਕਲੱਬਾਂ ਵੱਲੋਂ ਖਰਾਬ ਇਲੈਕਟ੍ਰੋਨਿਕ ਚੀਜਾਂ ਹਿੰਦੁਸਤਾਨ ਈ-ਵੇਸਟ ਮੈਨੇਜਮੈਂਟ ਕੰਪਨੀ ਦਿੱਲੀ ਨੂੰ ਦਿੱਤੀਆਂ ਜਾਣਗੀਆਂ ਜੋਕਿ ਸਭ ਖਰਾਬ ਇਲੈਕਟ੍ਰੋਨਿਕ ਚੀਜਾਂ ਨੂੰ ਰੀਸਾਇਕਲ ਅਤੇ ਨਸ਼ਟ ਕਰਨ ਦਾ ਕੰਮ ਕਰੇਗੀ।
ਲਾਇਨ ਦਵਿੰਦਰ ਗੁਪਤਾ ਨੇ ਦੱਸਿਆ ਕਿ ਇਸ ਈ-ਵੇਸਟ ਡੰਪ ਜਾਂ ਡੋਨੇਟ ਮੁਹਿੰਮ ਤਹਿਤ ਪ੍ਰਧਾਨ ਲਾਇਨ ਨਰਿੰਦਰ ਪਾਲ ਸਿੰਘ ਦੀ ਰਹਿਨੁਮਾਈ ਹੇਠ ਲਾਇਨਜ਼ ਕਲੱਬ ਖਰੜ ਵਲੋਂ ਈ-ਵੇਸਟ ਕਲੈਕਸ਼ਨ ਸੈਂਟਰ ਦੀ ਸ਼ੁਰੂਆਤ ਲਾਇਨਜ਼ ਕਲੱਬ ਆਫਿਸ ਖਰੜ, ਪ੍ਰਭੂ ਲਾਲ ਮੈਮੋਰੀਅਲ ਲਾਇਨਜ਼ ਚੈਰੀਟੇਬਲ ਕਲੀਨੀਕਲ ਲਬੋਰੇਟਰੀ, ਜੋਕਿ ਪੁਲਿਸ ਸਟੇਸ਼ਨ ਖਰੜ ਦੇ ਨਜਦੀਕ ਹੈ ਵਿਖੇ ਕੀਤਾ ਗਿਆ ਹੈ।
ਕਲੱਬ ਦੇ ਪ੍ਰਧਾਨ ਲਾਇਨ ਨਰਿੰਦਰ ਪਾਲ ਸਿੰਘ ਨੇ ਦੱਸਿਆ ਕਿ ਕੋਈ ਵੀ ਨਾਗਰਿਕ ਇਥੇ ਆਪਣਾ ਪੁਰਾਣਾ ਨਾ ਚੱਲਣਯੋਗ ਇਲੈਕਟ੍ਰੋਨਿਕ ਸਮਾਨ ਜਮ੍ਹਾ ਕਰਵਾ ਸਕਦਾ ਹੈ ਤਾਂਕਿ ਦੁਨੀਆ ਤੇ ਮੰਡਰਾ ਰਹੇ ਖਤਰੇ ਤੋਂ ਬਚਾਅ ਵਿਚ ਆਪਣਾ ਹਿੱਸਾ ਪਾ ਸਕੇ।
ਓਹਨਾ ਇਲਾਕਾ ਨਿਵਾਸੀਆਂ ਤੋਂ ਪੂਰਨ ਸਹਿਯੋਗ ਦੀ ਅਪੀਲ ਕੀਤੀ। ਪ੍ਰੋਜੈਕਟ ਦੇ ਲੌਂਚ ਮੌਕੇ ਹੋਰਨਾਂ ਮੈਂਬਰਾਂ ਤੋਂ ਇਲਾਵਾ ਕਲੱਬ ਦੇ ਸਕੱਤਰ ਲਾਇਨ ਅਨਿਲ ਗੁਪਤਾ ਤੇ ਲਾਇਨ ਰਮਨ ਸੂਦ ਵੀ ਹਾਜਰ ਰਹੇ।